Wasu mutane da ake zargin ’yan bindiga ne sun kai hari a daren Asabar zuwa ƙauyen Yankamaye da ke ƙaramar hukumar Tsanyawa a Jihar Kano, inda suka kashe wata tsohuwa sannan suka yi garkuwa da mutane uku.
Lamarin ya faru ne misalin ƙarfe 11 na dare, lokacin da yawancin mazauna yankin ke barci. Shaidu sun ce maharan sun isa gefen ƙauyen ne a kan babura, sannan suka shiga ƙauyen a ƙafa domin kaucewa janyo hankalin jama’a.
Wata majiya ta bayyana cewa maharan sun bindige tsohuwar matar ne bayan ta roƙe su da kada su tafi da ɗanta. “Ta roƙe su, amma suka harbe ta sannan suka tafi da ɗanta,” inji wani mazaunin ƙauyen da bai so a ambaci sunansa ba.
Bayan haka, ’yan bindigar sun shiga wani gida, inda suka sace wasu mata biyu, ɗaya daga cikinsu dangin kansilan yankin ce.
Kakakin rundunar ’yan sanda ta Kano bai amsa wayar manema labarai ba a lokacin da aka nemi jin ta bakinsa game da lamarin.