Rikici tsakanin manoma da makiyaya ya yi sanadin mutuwar mutum ɗaya a ƙauyen Bursali da ke ƙaramar hukumar Zaki, dake Jihar Bauchi.
Kakakin rundunar ’yan sandan jihar, CSP Ahmed Wakil, ne ya sanar da hakan a cikin wata sanarwa cewa lamarin ya faru da misalin ƙarfe 11 na safe a ranar 26 ga Nuwamba, 2025, lokacin da wasu makiyaya daga Jihar Jigawa suka shiga filayen noma ba tare da izini ba, inda suka lalata amfanin gona.
Wakil ya ce hakan ya tayar da hargitsi tsakanin makiyayan da mazauna yankin, lamarin da ya haifar da mutuwar wani makiyayi da ba a tantance sunan sa ba.
A cewar ƴan sandan an tura tawagar jami’an bincike zuwa yankin, kuma hakan ya kai ga kama mutane biyar da ake zargi da hannu a rikicin.