Gwamna Alex Otti, na jam’iyyar LP ya musanta jita-jitar da ake yadawa akan sa cewa yana shirin komawa jam’iyyar APC.
Otti, yace har yanzu yana cikin jam’iyyar LP wadda ta zama sanadiyar hawan sa kan kujerar Gwamna, tare da cewa zuwa yanzu bashi da wata manufa ko shirin ficewa daga jam’iyyar sa zuwa APC kamar yadda wasu ke yadawa.
Gwamna Otti, ya sanar da hakan ta bakin mai taimaka masa na musamman a fannin kafafen yada labarai Ferdinand Ekeoma, inda ya nemi a’lumma suyi watsi da labarin.
Otti ya ce ba zai dauki duk wata shawara ta siyasa da za ta yi tasiri ga al’ummar jihar Abia ba, ba tare tuntuɓa ba. Sannan ya roƙi a dena ɗaukar siyasa da zafi a daidai wannan lokaci da ya rage shekaru biyu kafin gudanar da zaɓe.