Za’a fara zana jarabawar NECO a ƙasar Burkina Faso

Hukumar Shirya Jarabawar kammala karatun sakandire ta Ƙasa (NECO) ta faɗaɗa aikin ta zuwa ƙasar Burkina Faso, inda ta amince da wasu makarantun ƙasar domin gudanar da jarabawar SSCE da BECE.

Wannan jawabi na kunshe cikin wata sanarwa da Mataimakin Daraktan Bayani da Hulɗa da Jama’a na hukumar, Azeez Sani, ya fitar a Abuja.

A cewar sanarwar, tawagar tantancewa ta NECO ta ziyarci wasu makarantun Burkina Faso, inda ta duba ajujuwa, ɗakunan gwaje-gwaje, ɗakin karatu, ɗakunan kwamfuta, dakunan jarrabawa, filayen wasanni da tsarin tsaro kafin bayar da cikakkiyar takardar amincewa.

Sani ya ce wannan ci gaban ya nuna yadda NECO ke ƙoƙarin faɗaɗa ayyukan ta zuwa ƙasashen ketare, tare da tabbatar da ingantacciyar jarabawa ga ɗaliban Najeriya da na ƙasashen waje.

Jakadan Najeriya a Burkina Faso, Amb. M. D. Galadima, ya yaba da matakin, yana mai cewa zai rage wa iyayen Najeriya da ke ƙasar wahalhalu da tsadar da suke fuskanta wajen kawo ’ya’yansu Nigeria domin rubuta jarabawa. 

Shugaban tawagar tantancewar NECO, Uche Ezenwanne, ya ce wannan mataki zai bai wa ɗaliban Najeriya mazauna Burkina Faso damar rubuta NECO ba tare da komawa gida ba, lamarin da zai ƙara ƙarfafa matsayin hukumar a nahiyar Afrika.