Sanata Kawu Sumaila ya rabawa manoman yankin sa tallafin inganta noma da tattalin arziki

Sanata mai wakiltar Kano Ta Kudu, Suleiman A. Kawu Sumaila (OFR, PhD), ya kaddamar da kason farko na shirin raba kayan tallafin noman rani ga manoma, wani gagarumin shiri da ake sa ran zai sauya fasalin noma tare da inganta tattalin arzikin karkara.

An gudanar da bikin kaddamarwar ne tare da halartar dubban manoma da sauran al’umma, inda Sanata Kawu ya bayyana shirin a matsayin “muhimmin tarihi” da ya yi daidai da Shirin Sabon Fata (Renewed Hope Agenda) na Shugaban Kasa Bola Ahmed Tinubu, wanda ya mayar da hankali kan samar da isasshen abinci, inganta rayuwar karkara da bunƙasa tattalin arziki.

Sanatan ya ce fiye da manoma da iyalai 10,000 za su amfana, wanda ya kasance ɗaya daga cikin manyan tallafin noman rani da gwamnatin tarayya ta taba kaiwa yankin.

Kayan da aka raba a mataki na farko sun haɗa da:

Injinan ban-ruwa 5,500

Rijiyoyin burtsatse 5,500

Babura– 165

Adaidaita Sahu – 165

Motar noma, maganin kwari da sauran su.

Sanata Kawu ya ce wadannan kayayyaki za su tabbatar da inganta noman rani, tallafa wa ƙananan manoma da kuma kawo sauƙi wajen jigilar kayan amfanin gona.

Muhimman sassa na babban shirin ban-ruwa sun haɗa da:

Gyaran manyan dam-dam guda uku domin samar da ruwa duk shekara

Buɗe sabbin yankunan noman rani

Gina hanyoyin karkara don sauƙaƙa zirga-zirgar amfanin gona

Sanya magudanan ruwa da gina matakan dakile ambaliya da zaizayar ƙasa

Sanatan ya nanata cewa shirin yana da nufin rage talauci, ƙarfafa sana’o’in dogaro da kai, da kuma rage gibin ci gaba tsakanin birane da karkara. Ya tabbatar da cewa Matakai na Biyu, na Uku da na Hudu na raba kayan suna kan tsari kuma za a ci gaba da aiwatar da su nan ba da jimawa ba.

A jawabinsa, Sakataren Gwamnatin Tarayya, Sanata George Akume, ya yaba da wannan aiki na Sanata Kawu, ya kuma yi alkawarin sanar da Shugaban Kasa game da nasarorin da aka samu a karkashin shirin Renewed Hope Agenda.