.){kind=link}
An samu rahotanni a ranar Alhamis cewa ana iya cire wasu sunaye daga cikin jerin mutanen da suka samu afuwar shugaban ƙasa da Majalisar Koli ta Ƙasa ta amince da su bisa gabatarwar Babban Lauyan Ƙasa, Prince Lateef Fagbemi (SAN).
Wannan mataki ya zo bayan ƙorafin jama’a kan haɗa sunayen wasu fitattun mutane da kuma masu aikata manyan laifukan cikin jerin wadanda shugaban ƙasa Bola Tinubu ya yi wa afuwa.
Dalilan Afuwar Shugaban Ƙasa
A cewar fadar shugaban ƙasa, an bayar da afuwar ne domin rage cunkoson gidajen yari da kuma ƙarfafa sulhu da yafiya.
Sanarwar ta bayyana cewa an bi shawarwarin Kwamitin Shawara kan Hakkin Yafiya na Shugaban Ƙasa, ƙarƙashin jagorancin Babban Lauyan Ƙasa.
A ranar Alhamis, Fagbemi (SAN) ya bayyana cewa jerin sunayen da shugaban ƙasa ya sanar bai kammala ba, domin har yanzu ana duba su.
Rahotanni sun nuna cewa EFCC da NDLEA suna cikin hukumomin da ke ƙoƙarin hana sakin wasu daga cikin waɗanda aka haɗa sunayensu cikin jerin.
Cikin waɗanda suka jawo cece-kuce akwai Maryam Sanda, wadda aka yanke wa hukuncin kisa a 2017 bayan ta kashe mijinta, Bilyaminu Bello.
Duk da cewa wasu daga cikin dangin marigayin sun ƙi amincewa da yafiyar, mahaifinsa, Alhaji Bello Isa, tare da mahaifin Maryam, Alhaji Garba Sanda, sun gudanar da taron manema labarai inda suka bayyana amincewarsu da afuwar shugaban ƙasa.