Shugabar riƙon INEC ta fara ganawa da shugabannin jam’iyyun siyasa

Shugabar riƙon INEC ta fara ganawa da shugabannin jam’iyyun siyasa

Mai riƙon Shugabancin Hukumar Zaɓe Mai Zaman Kanta ta Ƙasa (INEC), May Agbamuche-Mbu, ta gudanar da taron farko da shugabanni da sakatarorin jam’iyyun siyasa a babban ofishin hukumar da ke Abuja a ranar Talata.

Rahotanni sun bayyana cewa ganawar ta zama wani ɓangare na shirin hukumar na tattaunawa da masu ruwa da tsaki kafin zaɓen gwamnan Anambra da aka shirya gudanarwa a watan Nuwamba.

Duk da cewa cikakken bayani game da abin da aka tattauna a taron bai fito, majiyoyi sun ce taron ya mayar da hankali ne kan gyara al’amuran shirye-shirye da daidaita tsarin gudanar da zaɓe yadda za a tabbatar da sahihancin sakamako.

Wannan shi ne karo na farko da Agbamuche-Mbu ke jagorantar irin wannan zama tun bayan karɓar mukami daga Farfesa Mahmood Yakubu a ranar 7 ga Oktoba.

Yakubu ya sauka daga mukaminsa bisa tanadin sashi na 306 na kundin tsarin mulkin Najeriya, yayin da Majalisar Kasa ke jiran tabbatar da Farfesa Joash Ojo Amupitan a matsayin sabon shugaban hukumar bayan naɗin da Tinubu, ya yi masa.