Gwamnan Jihar Bauchi, Bala Mohammed, ya ce shi da gwamnan Jihar Oyo, Seyi Makinde, za su yi kyau a tikitin takarar shugaban kasa na jam’iyyar PDP a zaben 2027.
Ya bayyana haka ne a wata hira da talabijin ta Channels, inda ya ce PDP na bukatar Kirista daga Kudu a matsayin shugaban kasa tare da Musulmi daga Arewa a matsayin mataimaki.
Bala ya ce hakan zai taimaka wajen mutunta bambancin addini da kabilu a Najeriya, tare da guje wa kuskuren da APC ta yi a 2023 da batun tikitin Musulm-Musulm.
Ya ƙara da cewa PDP ba ta riga ta zaɓi wani mutum da zai yi mata takarar shugaban ƙasa ba, amma tana da buƙatar yin taka-tsantsan wajen tsayar da dan takara domin samun nasara a 2027.