Sojojin Jamhuriyar Nijar sun tabbatar da kashe wani fitaccen jagoran kungiyar Boko Haram, Bakura, a wani samamen soji da suka kai a yankin Tafkin Chadi da ke iyaka da Najeriya, Chadi da Kamaru.
Sanarwar da sojojin suka fitar a ranar Alhamis ta bayyana cewa an kaddamar da harin ne a wani tsibiri da ke yankin Diffa, kudu maso gabashin Nijar, a makon da ya gabata.
Bakura, wanda a zahiri ake kira Ibrahim Mahamadu, ɗan Najeriya ne mai kimanin shekara 40. Ya shafe sama da shekaru 13 a cikin Boko Haram, kuma ya jagoranci wani ɓangaren kungiyar mai biyayya ga tsohon shugabanta Abubakar Shekau. Bayan mutuwar Shekau a watan Mayu 2021, Bakura ya karɓi shugabancin wannan ɓangare.
Sojojin Nijar sun bayyana cewa an kai harin ne da jirgin yaki a safiyar 15 ga watan Agusta, inda suka harbi Bakura sau uku yayin da yake jagorantar mayaƙansa a Shilawa.
Rikicin Boko Haram, wanda ya samo asali tun shekarar 2009 a arewa maso gabashin Najeriya, ya kashe fiye da mutane 40,000 tare da tilasta wa sama da miliyan biyu barin muhallansu. Har ila yau, rikicin ya bazu zuwa ƙasashen makwabta, inda Nijar ta fara fuskantar hare-haren kungiyar a Bosso tun 2015.