Majalisar Dattawa Ta Amince da Kasafin Kuɗin Jihar Rivers na Shekarar 2025 Mai Naira Tiriliyan 1.485
Majalisar Dattawa ta amince da kasafin kuɗin Jihar Rivers na shekarar 2025, wanda ya kai kimanin Naira tiriliyan 1.485, bayan karanta kudirin kasafin karo na uku a zaman majalisar da aka gudanar a yau.
Amincewar ta biyo bayan gabatar da rahoton Kwamitin wucin gadi kan al’amuran Jihar Rivers yayin zaman Kwamitin Kayayyakin Aiki na Majalisar.
Kudirin ya nemi amincewar cire Naira 1,485,662,592,442 daga Asusun Tarayya na Jihar Rivers domin aiwatar da kasafin kuɗin shekarar da za ta ƙare ranar 31 ga Disamba, 2025.
Rarrabe-rarraben kasafin sun haɗa da Naira biliyan 120.8 domin biyan bashin da ake bi, Naira biliyan 287.38 domin kuɗin gudanarwa (banda biyan bashi), da kuma Naira tiriliyan 1.077 domin manyan ayyuka na ci gaba.
A watan Mayu, Shugaba Bola Ahmed Tinubu ya mika kasafin kuɗin shekarar 2025 na Jihar Rivers ga Majalisar Tarayya domin tantancewa, bayan dakatar da Majalisar Dokokin Jihar.
A wata wasiƙa da Shugaban Ƙasa ya aika wa Shugaban Majalisar Dattawa, Sanata Godswill Akpabio, an bayyana cewa jimillar kasafin kuɗin da aka gabatar ita ce Naira tiriliyan 1.481, inda aka fi mayar da hankali kan farfaɗo da muhimman sassan tattalin arziki da walwalar jama’a.
Haka zalika, Shugaba Tinubu ya rubuta wa Majalisar Wakilai domin neman amincewa da wannan kasafi, yana tunatar da su cewa Kotun Ƙoli ta soke kasafin kuɗin da Gwamna Siminalayi Fubara (wanda aka dakatar) ya gabatar.