Rundunar Hisbah ta jihar Kano ta kama wani saurayi da budurwa da suka daurawa kansu aure akan titin Zoo Road, dake kwaryar birnin Kano.
Daily News 24, ta rawaito cewa, mataimakin babban kwamandan rundunar Dr. Mujahiddin Aminudden Abubakar, ne ya sanar da hakan cikin bayanan daya gabatar bayan kamo mutanen zuwa shalkwatar Hisbah, dake Sharada, a daren Laraba.
Yace lamarin ya faru a dandalin shakatawa na Banana, akan titin Zoo Road, da wani saurayi da budurwa suka hadu da abokan su suka daura auren.
Yace ko kadan Hisbah ba zata zuba ido tana bari wasu daga cikin mutane su rika keta haddin Sunnar Annabi Muhammad SAW, da addinin muslinci ba.
Dr. Mujahiddin Aminudden, ya kara da cewa dole ne a dauki matakin dakatar da wannan izgilanci da wasu ke yiwa aure da kuma mayar da shi tankar wani abun wasa.
Zuwa yanzu dai rundunar Hisbah ta jihar Kano, ta kama Ango da Amarya, a daidai lokacin da ake kokarin kamo sauran wadanda suka bayar da gudunmuwar daura auren na kan hanya ba tare da sanin iyaye ba.