Tsohon shugaban ƙasa, Dr. Goodluck Jonathan, ya bayyana cewa juyin mulkin da aka yi a Guinea Bissau ya dame shi kuma ya yi masa zafi fiye da lokacin da ya sha kaye a hannun Muhammadu Buhari a zaɓen shekarar 2015.
A cewarsa: “Abin da ya faru a Guinea Bissau abin tashin hankali ne a gare ni, musamman ni da nake da imani da dimokuraɗiyya.
Gaskiya ina jin zafi fiye da ranar da na kira Buhari na taya shi murna bayan na sha kaye a matsayin shugaban ƙasa mai ci.”
Jonathan ya bayyana haka ne a cikin wani faifan bidiyo da jaridar Saturday PUNCH ta samu, inda ya ce lamarin ya fi komai tada masa hankali saboda dogon lokacin da ya shafe yana aiki wajen tabbatar da dimokuraɗiyya a ƙasar.
Tsohon shugaban ƙasar ya kasance a Guinea Bissau a matsayin wakilin ** kungiyar dattawan Afrika ta yamma, domin sa ido kan zaɓen shugaban ƙasa da na ‘yan majalisa. Sai dai juyin mulkin ya rutsa da shi da tawagar sa, lamarin da ya jefa su cikin fargaba tare da tayar da hankula.
Jonathan, wanda daga bisani aka ceto aka kuma dawo da shi Najeriya ranar Alhamis, ya ce abin da ya faru ya girgiza shi ƙwarai.