Gwamnatin Kano ta bukaci a gaggauta kama tsohon Gwamnan jihar Dr. Abdullahi Umar Ganduje tare da gudanar da cikakken bincike a kan “maganganun sa masu tayar da hankali” game da batun tsaro a jihar.
Wannan mataki ya biyo bayan zaman majalisar zartarwa na jiha karo na 34, wanda aka gudanar a gidan gwamnati, inda aka tattauna kan kalaman da Ganduje da Mataimakin Shugaban Majalisar Dattawa, Barau I. Jibrin, suka yi cewa Kano na fuskantar barazanar ta’addanci, tare da ikirarin cewa za a dauki mutane 12,000 domin kafa rundunar ‘yan banga ta addini mai suna Khairul Nas.
A yayin taron manema labarai da aka yi ranar Juma’a, Kwamishinan Yada Labarai da Harkokin Cikin Gida, Ibrahim Abdullahi Waiya, ya ce irin waɗannan kalamai na iya haddasa rudani da lalata kokarin gwamnati da na gwamnatin tarayya wajen tabbatar da tsaro.
Gwamnatin ta nuna damuwa cewa cikin kasa da sa’o’i 48 bayan kalaman, wasu da ake zargin ’yan bindiga ne sun kutsa wasu kauyuka a iyakar jihar, abin da majalisar ta ce ya sa ake tambayar ko maganganun suna da alaka da lamarin.
> “Ba mu san manufar Ganduje ba da irin waɗannan kalamai. Don haka muna kira da a kama shi domin bincike. Ba za mu zuba ido a bar wani ya tada hankalin jama’ar jihar ba,” in ji Waiya.
Gwamnatin Kano ta jaddada godiyar ta ga gwamnatin tarayya da hukumomin tsaro kan goyon bayan da suke bayarwa, tare da bayyana cewa ba za ta bari a kirkiri wata rundunar banga ko ƙungiyar tsaro ba tare da izni ba.
Haka kuma ta gargadi shugabannin siyasa da su guji yin kalamai da ka iya tada fitina, tare da tabbatar wa al’ummar jihar cewa gwamnati na ɗaukar dukkan matakan da suka dace domin kiyaye zaman lafiya da doka.